Kua whakaputa Te Tari Taiwhenua i ngā tino ingoa Māori mō ngā pēpi i 2024/2025

19 Pipiri 2025

Mō te toru tau kua hori nei, ko Aroha/Te Aroha/Te-Aroha/TeAroha (173) kei runga i te rārangi mō ngā kōtiro, ko Ariki/Te Ariki/Āriki/te Ariki (137) i noho tonu ko te tino ingoa mō ngā tama tāne.

Ko te roanga atu o ngā tino ingoa e rima mō ngā kōtiro, ko: Maia/Māia/Te Māia, Moana/Te Moana, Anahera/Te Anahera me Atarangi/Te Atarangi/Te Ataarangi/Te-Atarangi. Mō ngā tama tāne, ko ētahi atu tino ingoa, ko Wiremu, Koa, Mikaere me Rangi/Te Rangi/te Rangi/te rangi/Te-Rangi.

“He kōrero kei ia ingoa. Koia e whakaatu nei i te whakapapa, te tuakiri me ngā tūmanako o te whānau mō ā rātau tamariki,” hei tā te Kairēhita-Matua o Ngā Whānautanga, Ngā Matenga me Ngā Mārenatanga, ko Russell Burnard.

Ka whakamiramira a Burnard i te mahi nui ki te whakarite i te rārangi.

“Ka kōkiri mātau i te whakarārangitanga o ngā ingoa pēpi Māori i runga i te tino whakaute me te kawenga ahurea. Ka āta arotaketia ia ingoa ki te whakarite ka hāngai ki ngā tikanga mō te te reo Māori—tae atu ki ngā hanga o ngā oropuare me ngā orokati, me te wāhi ki ngā tohutō.

“I tā mātau tukanga, ka kōrero ki ngā kaumātua, ka riro mā Te Taura Whiri i te Reo Māori te arotake whakamutunga. Ko te whāinga o tēnei mahi tahi, he whakahōnore i te mana o ngā ingoa Māori.”

Ko ngā ingoa tōmua, tōwaenga hoki kei tēnei rārangi, he mea rēhita mai ki Te Tari Taiwhenua i waenga i te 1 o Hōngongoi 2024 me te 18 o Pipiri 2025. Ka hāngai ēnei rā ki te wā o Tangaroa e hono ana ki Matariki i te maramataka, hei tā ngā tohutohu o te Matariki Advisory Committee.

Kua whakaputa Te Tari Taiwhenua i te rārangi o ngā tino ingoa pēpi Māori mai i 2013. Ko 2022/2023 te tau tuatahi i whakahāngaitia te rārangi nei ki Matariki.

Kia tirotiro i te rārangi ingoa pēpi Māori katoa mai i 2024/2025, 2023/2024, me 2022/2023, me toro atu ki te pae tukutuku SmartStart: https://smartstart.services.govt.nz/news/baby-names-maori

-KA MUTU-

Ngā tino ingoa pēpi

• Top Māori baby names by year (2022-23 - 2024-25) – PDF, 65KB

Ko tā mātau hātepe
1. Ka whakarite mātau i tētahi rārangi taumātaki i te tuatahi mā te tango ake i ngā ingoa tōmua, tōwaenga katoa mai i ā mātau raraunga rēhita whānautanga e whakatutuki ana i ngā āhuatanga e rārangi iho nei:

• Ko ngā oropuare ko te i, e, a, o, u anake (me ngā oropuare roa)
• Ko ngā orokati ko te p, t, k, m, n, ng, wh, r, h, w anake
• Me mutu ngā ingoa katoa ki te oropuare

2. Me tutuki hoki i ngā ingoa tōmua, tōwaenga katoa ko tētahi, nui atu rānei, o ngā paearu e rārangi iho nei:

• Me noho rānei ki tētahi papakupu reo Māori e whai mana ana hei kupu, heoi ngā ingoa pūhui (hei tauira ko Hineteuru), me noho mai ko ngā wāhanga tonu o te ingoa pūhui,
• Ka tirohia ngā ingoa mō ngā tohutō. Mehemea kua tuhia te ingoa me tētahi tohutō, ko te tikanga he ingoa Māori nō reira me ‘whakamātau’ ki ngā aratohu.

3. Ko ngā ingoa tōmua, tōwaenga hoki ka whakatutuki i ngā paearu o runga nei, engari he maha ngā pūtake, ka tangohia atu.

• Ko te tikanga o tēnei, mā te tango atu i te ōwehe o ngā ingoa kāore i takea mai i te reo Māori ka kore e kitea tērā ingoa ki te rārangi o ngā tino ingoa Māori.
• Ka kōrerotia tā mātau rārangi me ō mātau kaumātua, kātahi ka whakamātauria ā mātau tūtohunga e Te Taura Whiri.

Tama – Boys

Ingoa	Kaute
Ariki/Āriki/Te Ariki/te Ariki	137
Wiremu	100
Koa	76
Mikaere	74
Rangi/Te Rangi/te Rangi/te rangi/Te-Rangi	70
Nikau/Nīkau	68
Rawiri/Rāwiri	65
Kiwa	55
Kahurangi/Te Kahurangi	52
Manaaki	51

Kōtiro – Girls

Ingoa	Kaute
Aroha/Te Aroha/Te-Aroha/TeAroha	173
Maia/Māia/Te Māia	137
Moana/Te Moana	84
Anahera/Te Anahera	66
Atarangi/Te Atarangi/Te Ataarangi/Te-Atarangi	60
Manaia	58
Rangimarie/Rangimārie/Te Rangimarie	54
Rangi/Te Rangi/te Rangi/te rangi/Te-Rangi	49
Marama/Mārama/Te Marama	48
Tui/Tūī	45